Зрелата круша има посебна мирисна привлечност: сочна е, нежно слатка и свежа, без да биде ниту премногу разиграна ниту премногу сериозна. Во парфемските композиции оваа овошна нота добива сосема поинакви нијанси. Некогаш потсетува на штотуку набрано овошје покриено со утринска роса, а некогаш преминува во кремаст, речиси гурмански акорд што ја обвива кожата како најмек кашмир. Затоа парфемите со круша нудат многу повеќе од едноставен овошен мирис.
Во комбинација со фрезија и роза добиваат елеганција и женственост, цитрусите им носат искричава свежина, а ванилата, мошусот и сандаловината ги прават потопли и посензуални. Издвоени се седум мириси што ги откриваат различните страни на оваа нота — од лесни, прозрачни композиции што асоцираат на чиста кожа, до раскошни парфеми со впечатлива мирисна трага.
Парфеми во кои крушата ги спојува свежината и сладоста
Ella K Pluie Sur Ha Long
Pluie Sur Ha Long од Ella K ги претставува овошните ноти во свежо, речиси водено издание, инспирирано од атмосферата на тропски дожд. На почетокот се чувствува сочната и благо киселкаста наши-круша, испреплетена со рабарбара и розов бибер. Во срцето се отвораат лотос, воден јасмин, магнолија и роза, чии нежни цветни ноти се надоврзуваат како контраст на почетната овошна свежина. Основата од мошус и дрвенести ноти ја заокружува композицијата и ѝ дава мекост. Станува збор за префинет мирис за љубителите на лесни, природни ароми со ненаметлив овошен карактер.
Lancôme La Vie Est Belle
La Vie Est Belle од Lancôme ја открива потоплата и пораскошна страна на крушата, блиска до вкусот на оние што сакаат послатки парфеми. Во почетните ноти нејзината сочност се спојува со црна рибизла, додека ирисот, јасминот и цветот од портокал создаваат елегантен цветен карактер. Пралинeте, ванилата и пачули ја заокружуваат композицијата со топли, гурмански акорди и ѝ ја даваат препознатливата длабочина. Крушата тука не е водечката овошна нота, туку свежиот елемент што ја урамнотежува сладоста и го прави мирисот послоевит. Парфемот им одговара на оние што претпочитаат изразени композиции со топла, слатка завршница.
Guerlain Aqua Allegoria Pera Granita
Pera Granita од колекцијата Aqua Allegoria на Guerlain е речиси мирисна верзија на леден десерт од круша. Сочната и освежителна овошна нота се преплетува со грејпфрут и лимон, а османтусот внесува нежна овошно-цветна нијанса. Во завршницата, дрвенестите ноти и мошусот ја смируваат цитрусната острина и оставаат мека мирисна трага. За разлика од гурманските композиции, во кои крушата ја засилува сладоста, тука во преден план се свежината, леснотијата и живоста. Pera Granita е интересен избор за оние што сакаат освежителни мириси кои потсетуваат на сочно овошје и ведри летни денови.
Ephemeral Dyadic Acid Aqua
Acid Aqua од Ephemeral Dyadic нуди современ пристап кон овошните и цитрусните акорди. Крушата е здружена со кумкват, кој внесува жива цитрусна острина, додека розовиот бибер и кардамонот додаваат зачински нијанси. Во завршницата се развиваат бел мошус, амброксан и сандаловина, создавајќи мека, чиста и благо дрвенеста основа. Токму спротивставувањето на сочните овошни тонови, зачините и топлите дрвенести ноти му го дава современиот карактер. Во Acid Aqua крушата не останува само слатка и разиграна, туку добива и понеочекуван, ароматичен израз.
Извор: Lepota i Zdravlje
Учество во игри на среќа е дозволено за лица со 18+ години. Играј одговорно!