Оваа сезона руменилото добива многу поизразена улога во шминкањето. Наместо нежнорозови тонови што му даваат на лицето дискретна свежина, во прв план излегуваат длабоки црвени и бобести нијанси, инспирирани од природната боја на зацрвенетите образи по подолг престој на студ. Cranberry cheeks, односно руменило во нијанса на брусница, е еден од позабележителните beauty трендови за есен/зима 2026, а неговата популарност ја потврдуваат и ревиите на модните куќи Simone Rocha и Erdem.
Овој тренд се наоѓа на интересна граница меѓу романтичен и малку бунтовен изглед. Бојата е интензивна, но не мора да делува тешко: кога добро ќе се втопи во кожата, создава впечаток на природно руменило, како образите навистина да се зацрвенеле од студот. Токму таа комбинација од суров, малку неуреден ефект и длабока црвена боја ги прави cranberry cheeks еден од поинтересните начини да ја освежиме есенската и зимската makeup рутина.
Руменило во боја на брусница беше забележано на ревиите на Simone Rocha и Erdem
На ревијата на Simone Rocha за есен/зима 2026, шминкерот Thomas de Kluyver создаде изглед што се оддалечува од совршено изедначен тен. Наместо класично руменило, тој користеше црвен кармин Byredo Stromboli, нанесувајќи го директно на образите за да постигне интензивна, малку разиграна боја. Резултатот беше спој на романтичната естетика карактеристична за дизајнерката и панкерски призвук, со кожа што изгледа поприродно и помалку измазнето.
На ревијата на Erdem истиот тренд доби понежна интерпретација. Шминкерката Fara Homidi инспирацијата ја пронајде во розовиот сатен и црвените ленти од колекцијата, а руменилото во боја на брусница го искористи за на лицето да му додаде суптилен, но забележлив налет на боја. Овој пристап покажува дека cranberry cheeks не мора да биде драматичен: доволно е малку пигмент за тенот да добие топлина и живост.
Како се носи трендот cranberry cheeks?
За разлика од класичното руменило, кое најчесто го користиме за да ги нагласиме јагодиците и да му дадеме свежина на лицето, cranberry cheeks го става акцентот на самата боја. Нијансите се движат од пригушена црвена и боја на брусница до потемни тонови на малина, капина и вино. Најважно е пигментот да изгледа како дел од тенот, а не како јасно одвоена линија на образите. Инспирација може да се најде и на ревијата на Annie’s Ibiza, каде што шминкерката Becky Moore комбинираше две NARS руменила, нијансите Hunger (962) и Mad Love (907), за да добие длабока бобеста боја. Остатокот од тенот остана минимално нашминкан, па образите беа во прв план.
Ако сакаме да го испробаме овој тренд во секојдневното шминкање, најдобро е да почнеме со мала количина производ и постепено да го засилуваме интензитетот. Кремастите и течните руменила се одлични за постигнување ефект на боја што се слева со кожата, додека камените руменила се практични за попрецизно дозирање и слоевито нанесување.
Кое руменило да го изберете за овој тренд?
За поблага верзија на трендот, изберете проѕирно руменило во постудена црвена или темнорозова нијанса, кое може да се втапка со прсти или со сунѓерче. За поизразен ефект, сличен на оној од ревијата на Simone Rocha, ќе одговара попигментирано руменило во боја на брусница или темна малина. Важен е и начинот на нанесување. Руменилото може да се втапка на средината на образите и внимателно да се изблендира кон јагодиците, додека малку поинтензивната боја во централниот дел на лицето ќе создаде впечаток на природна зацрвенетост. Ако сакате подраматичен резултат, бојата може благо да се прошири кон слепоочниците, внимавајќи премините да останат меки.
Cranberry cheeks најдобро доаѓа до израз со изедначен, но не премногу матиран тен, дискретно дефинирани веѓи и неутрални усни. Сепак, нема потреба остатокот од шминката секогаш да биде целосно сведен: со темноцрвен кармин може да добие романтичен, вечерен карактер, додека со маскара и балсам за усни ќе делува свежо и ненаметливо. Она што го прави овој тренд особено интересен е неговата прилагодливост. Еден слој руменило е доволен за суптилен ефект, додека со дополнително нанесување се добива поинтензивна боја. Затоа руменилото во боја на брусница не е резервирано само за модните писти – може да стане и едноставен начин на вообичаената есенска и зимска шминка да ѝ додадете малку длабочина, карактер и боја.
Извор: Lepota i Zdravlje
Учество во игри на среќа е дозволено за лица со 18+ години. Играј одговорно!