„Тру крим“ филмови кои ги гледаме за Ноќта на вештерките

Од Jovan

Објавено пред 2 часа

Тру крим филмовите имаат нешто што класичните хорор и трилер филмови тешко можат да го надминат, а тоа е сознанието дека злосторствата кои ја инспирирале приказната навистина се случиле. Наместо натприродни појави и измислени чудовишта, во центарот на дејството се вистински случаи, убијци кои со години ја избегнувале правдата и истраги кои ја откриле мрачната страна на човечката природа. Како што се приближува Ноќта на вештерките, сè повеќе сме расположени за мрачни филмски приказни, напнати заплети и мистерии. Во продолжение ви носиме избор на тру крим филмови инспирирани од вистински злосторства кои ќе ве вовлечат во некои од најстрашните случаи од криминалната историја.

Тру крим филмови за љубителите на мрачни приказни и вистински злосторства

Zodiac

Ако сакате криминалистички приказни каде секој нов траг отвора уште повеќе прашања, Zodiac е филм кој не треба да го пропуштите. Режиран од Дејвид Финчер, овој мрачен трилер нè враќа во Калифорнија во шеесеттите и седумдесеттите години, кога серискиот убиец познат како Зодијак испраќаше шифрирани пораки до весниците и предизвикуваше страв низ Сан Франциско. И покрај големата полициска истрага и вниманието на јавноста, неговиот идентитет никогаш не беше официјално потврден.

Карикатуристот Роберт Грејсмит, кого го игра Џејк Џиленхол, станува опседнат со случајот, додека Роберт Дауни Џуниор игра новинарот Пол Авери, а Марк Руфало инспекторот Дејвид Тоски. Како што истрагата напредува, потрагата по убиецот почнува да влијае на нивните приватни животи, односи и способноста да се вратат на секојдневието. Токму во тоа лежи посебната напнатост на филмот, бидејќи не е само прашање кој ги извршил злосторствата, туку и што се случува со луѓето кои со години се обидуваат да дојдат до одговори.

Monster

Шарлиз Терон во филмот Monster, каде што ја игра Ајлин Вурнос, сериска убијка која во осумдесеттите и деведесеттите години уби неколку мажи на Флорида, оствари една од највпечатливите трансформации некогаш видени на филм. Monster го следи нејзиниот однос со љубовницата Селби Вол, но и настаните кои претходеле на злосторствата и довеле до нејзиното апсење.

Овој филм донесува мрачен портрет на жена чиј живот бил обележан со насилство, траума од детството и низа деструктивни одлуки. Шарлиз Терон за оваа улога освои Оскар за најдобра актерка, а нејзината интерпретација е еден од главните причини зошто вреди да се погледне овој филм.

Extremely wicked, shockingly evil and vile

Тед Банди е еден од најпознатите сериски убијци во американската и светската историја, а филмот Extremely wicked, shockingly evil and vile носи поинаков поглед на него. Наместо да се фокусира првенствено на самите злосторства, приказната е раскажана од перспективата на неговата долгогодишна партнерка Елизабет Лиз Кендал, која долго време не можела да поверува во обвиненијата против човекот кој го познавала.

Зак Ефрон го игра Банди, додека Лили Колинс ја игра Лиз. Филмот истражува како шармантна и наизглед сосема обична личност може да крие насилна страна, но и колку е тешко да се прифати вистината кога таа не се вклопува во сликата што ја имаме за некого кого сакаме. Токму оваа психолошка димензија го прави особено непријатен за гледање.

The good nurse

Приказната на овој филм следи Ејми Лорен (Џесика Честејн), медицинска сестра и самохрана мајка која работи исцрпувачки смени на интензивна нега. Кога ѝ се придружува нов колега Чарли Кален (Еди Редмејн), тој на почетокот изгледа како некој на кого може да се потпре. Сепак, низа одеднашни смртни случаи на пациенти и чудни околности под кои се случиле тие смртни случаи, во неа будат сомнеж. Додека болницата се обидува да најде одговори, Ејми се соочува со сè потешкото сознание дека човекот на кого му верува може да биде поврзан со она што се случува.

Еди Редмејн донесува суптилна и ладна интерпретација на човек чијашто однесување на прв поглед не оддава опасност, додека Џесика Честејн ги прикажува стравот, дилемите и храброста на жена која одлучува сериозно да го сфати она што другите се обидуваат да го игнорираат.