5 причини зошто треба да започнете со медитација

Медитацијата е пракса на умот и телото каде вниманието се насочува кон сегашната свесност, кон здивот и умот.

Целта ѝ е да ја поттикне свесноста, да негува благосостојба и да го намали стресот и анксиозноста.

Постојат различни видови и начини на практикување медитација, и може да се практикува речиси секаде, сè додека сме свесни за нашето тело и околина. Видовите медитација варираат од лични преференци, и може да вклучуваат дишење, пракси на присутност, визуелизации инспирирани од природата, мантри и духовна медитација. Медитацијата може значително да го подобри квалитетот на животот благодарение на своите психолошки и физички придобивки.

1. Медитацијата го намалува стресот

Истражувањата покажуваат дека медитацијата, како форма на свесна интервенција, има големо влијание врз менталното здравје, особено во справување со стрес. Кога сме под притисок, телото започнува да лачи кортизол, хормон кој ја регулира реакцијата на стрес и акцијата „бори се или бегај“, меѓу други функции. Хроничен, долготраен стрес води до постојано покачено ниво на кортизол, што може негативно да влијае врз здравјето. Со тоа што ја смирува умствената активност и емоциите, медитацијата помага во подобро управување со стресот, а со тоа и во намалување на ризикот од негови несакани последици.

2. Помага при управување со анксиозноста

Медитацијата помага во справување со физичките и психичките ефекти на анксиозноста и стресот. Истражувања покажуваат дека луѓе со анксиозно растројство кои редовно медитирале во текот на три години, доживеале значителни и долготрајни подобрувања на менталното здравје.

3. Ја зајакнува функцијата на имунолошкиот систем

Утврдена е како ефикасна бихевиорална терапија кај состојби каде имунолошкиот систем е ослабен. Исто така, медитацијата го намалува одговорот на организмот врз стресни ситуации, што резултира со намален воспалителен одговор и со тоа помал ризик од хронични состојби како болки, замор и срцеви заболувања.

4. Медитацијата ја подобрува меморијата

Според истражување, мозокот произведува повеќе сива маса за време на медитација. Сивата маса е клучна за когнитивната функција бидејќи игра значајна улога за хипокампусот – дел од мозокот поврзан со меморијата. Исто така, е важна за основни човекови способности, како контролата на движења и емоции. Истата студија покажала дека 30 минути медитација дневно во текот на осум недели водат до зголемено производство на сива маса во мозокот.

5. Ја регулира емоционалната состојба

Со текот на времето, медитацијата може да го промени начинот на кој емотивно реагираме на различни ситуации. Елементите како свесност и контролирано дишење влијаат да реагираме помалку импулсивно. Тоа значи дека во ситуации исполнети со бес или паника, можете да научите да го регулирате расположението на посмирен и поуспешен начин.