Скопски „Кец“ го одобри обвинението: Мијалков ќе седне на обвинителна клупа за „Трезор“

Бившиот директор на УБК, Сашо Мијалков, заедно со Горан Грујевски, поранешниот началник на Петтата управа, Тони Јакимовски, поранешен шеф во кабинетот на Мијалков и Небојша Сајковиќ, екс помошник министер во МВР, наскоро ќе седнат на обвинителна клупа и за случајот „Трезор“, пренесува Нова ТВ.

Советот за оценка на обвинитениот акт при Основниот суд Скопје 1- Скопје го одобрил обвинението за овој случај, во кој обвинетите се товарат дека проневериле државни пари за набавка на софтвер од странство за потребите на Петтата управа.

Што е случајот Трезор

Поранешниот директор на УБК Сашо Мијалков, поранешниот началникот на петтата управа Горан Грујовски, шефот на кабинетот на Мијалков,Тони Јакимовски и бившиот помошник министер во МВР и член на Управен одбор на Телеком Небојша Стајковиќ се осомничените во случајот Трезор, дознава НОВА од судски извори.

Првите тројца осомничени, Мијалков, Јакимовски и Грујовски, во 2010 година отпатувале во Лондон и договориле набавка на опрема за пресретнување на комуникациите и обука за користење на опремата за потребите на Петтата управа. Но, наместо набавката да оди директно преку Министерството, осомничените функционери ја вклучиле и компанијата „Финзи“ како застапник на МВР.

Според приложеното од Специјалното јавно обвинителство, „Финзи“, откако ја презела набавката во свои раце во договор со УБК и МВР, увозот на опремата го фактурирала по двојно поскапа цена. Набавката е направена во 2010 година, а „Финзи“ е формирана кон крајот на 2009 година. Легитимните дилеми кои ги отвори СЈО во истрагата се како „Финзи“, која во тоа време немала ниту еден вработен, а ниту пари за да ја набави опремата, била одбрана за партнер во МВР, но и зошто воопшто имало потреба од посредник во зделката. Не е јасно ниту каде завршиле парите со коишто е директно оштетен буџетот, а кои легнале на нивната сметка.