Зимата можеби не е вашето омилено годишно време, но истражувањата покажуваат дека постудените месеци можат да имаат многу здравствени придобивки.
Студеното време и ниските температури можат да му помогнат на нашето тело на неколку неочекувани начини. Како?
Студот може да го зајакне срцето
Студеното време навистина може да го зајакне срцето, особено кога станува збор за зимските тренинзи на отворено. Ниските температури го прават вежбањето поинтересно и поинтензивно, а срцето треба да пумпа повеќе крв не само за време на физичката активност, туку и за да ја зачува телесната температура. Покрај тоа, вежбањето во текот на зимата може да ја зајакне срцевата мускулатура.
Пониските температури го зајакнуваат мозокот
Студеното време може да помогне за подобра ментална јасност. Истражувањата покажуваат дека луѓето имаат подобри когнитивни способности кога температурата во просторијата е пониска. Освен тоа, постојат докази дека во текот на летото е поголема веројатноста за когнитивни проблеми отколку во зима. Значи, една брза зимска прошетка може да ве инспирира со нови идеи.
Студот го забрзува согорувањето на калориите
Кога е студено, телото троши повеќе енергија за да ја одржи својата температура. Тоа значи дека метаболизмот работи побрзо, што води до зголемено согорување на калории.
Помага при алергии
Ако страдате од сезонски алергии, студеното време нуди олеснување. Поленот речиси исчезнува кога времето е студено или има снег.
Студот ја зајакнува способноста за борба со инфекции
Иако во зима можеби почесто се чувствувате настинато, вашиот имунолошки систем всушност работи подобро. Истражувањата покажуваат дека изложеноста на студ може да ја активира имунолошката одбрана, што му помага на телото поефикасно да се бори против инфекции.
Студот може да ја намали воспаленоста
Знаете дека мразот се користи за намалување на оток и болки по повреди? На сличен начин, зимскиот студ може да помогне во намалување на отеченоста на зглобовите и воспаленијата во телото, делувајќи како природен аналгетик.
Може да го намали ризикот од одредени болести
Иако во зима има зголемен ризик од настинки, ниските температури помагаат во заштитата од некои вируси и болести кои се почести во потоплите месеци. На пример, болестите што ги пренесуваат комарците се значително поретки во зимски услови.
Студот го подобрува квалитетот на сонот
Телото природно ја намалува температурата за време на заспивањето. Во текот на летото, овој процес може да потрае подолго поради топлината, додека во зима тоа се случува побрзо, овозможувајќи подобар и поквалитетен сон. Покрај тоа, покусите денови значат подолга темнина, што му помага на телото подобро да се одмори.
Студот може да ја подмлади кожата
Пониските температури можат да бидат корисни за кожата бидејќи ги стеснуваат крвните садови, што го намалува црвенилото и отеченоста. Исто така, во зима кожата лачи помалку себум, што може да помогне во спречување на појава на акни и други кожни проблеми.
