Садам Хусеин верувал дека Иран претставува значајна закана за Ирак и ја оставил отворена можноста неговата земја да поседува оружје за масовно уништување, за да не изгледа слаба.

Ова се наведува во штотуку објавениот извештај на ФБИ, изготвен врз основа на испитувањата на поранешниот ирачки лидер.

Во извештајот на ФБИ се наведува дека Садам сметал оти неговата земја ја загрозуваат останатите земји од регионот и поради тоа Ирак мора да се прикаже како држава способна да се брани, пренесе Ројтерс.

„Садам сметаше дека Ирак не може да биде слаб во однос на своите непријатели, особено Иран“, запишал специјалниот агент Џорџ Пиро по разговорите со ирачкиот претседател во јуни 2004 година.

Извештајот на ФБИ открива дека Садам бил повеќе загрижен Иран да не ги открие ирачките слабости отколку што се плашел од потегот на САД, откако го спречи враќањето на инспекторите на ОН кои во Ирак бараа оружје за масовно уништување.

„Според него, инспекторите на ОН директно би им покажале на Иранците каде можат да им нанесат максимална штета на Ирачаните“, се вели во документите кои ги објавил невладиниот истражувачки институт Национален архив за безбедност.

Садам во 1980 година поведе погранична војна со Иран, која траше осум години и за време на која ирачката страна користеше хемиско оружје.

Поранешниот претседател на САД Џорџ Буш во 2003 година изврши воена интервенција против Ирак, наведувајќи ја како причина закана со оружје за масовно уништување кое таа земја, наводно го поседува.

Оружје за масовно уништување никогаш не е пронајдено во Ирак.