Хироши Ишигуро, виш истражувач во јапонската ATR лабораторија за интелигентна роботика и комуникација, создаде робот реплика на него. ’Близнакот’ Геминоид ХИ-1 изгледа и се движи исто како него.

Создаден за да го замени како професор на Универзитетот во Осака, роботот близнак наречен Geminoid HI-1 дури го поседува и уникатниот карактер на неговиот сопственик.

Седи и нетрпеливо тапка со нозете, а може и да седи на стол гледајќи наоколу по собата. Рамената му се подигаат како навистина да дише. Изработен е од силиконски калап направен според телото на Ишигуро, а го движи воздух во херметички систем со мали активатори. Микродвижењата ги изведува со полуавтономни програми за движење.

Далечинското управување достигнува нови граници, па Ишигуро сега може да зборува преку роботот праќајќи го гласот со помош на сензори на своите усни од дома, на еден час возење со автомобил оддалеченост од универзитетот.

Ишигуро се труди преку роботот да го наметне чувството на присутност, во Јапонија познато како sonzai-kan. Токму оваа нематеријална карактеристика го чини Geminoid HI-1 по малку морничав.

„Идејата е теле-интеракција. Ако до андроидот пристапувам преку интернет, не морам повеќе да одам до ATR лабораториите. Сакам да проверам колку моите студенти или моето семејство може да го почувствуваат моето присуство преку Геминоидот. Кога би можел да имам по еден робот на универзитетот и еден во ATR, би можел да ги извршувам сите задолженија од некое летувалиште“, се шегува Ишигуро.

Тој, овој пристап со комбинирање на инженеринг и когнитивна наука, со цел изведување експерименти за човечката перцепција, го нарекува ’андроидна наука’. На Геминоидот гледа како на транспортно средство кое може да користи во проучување на човечката природа.