Советската разузнавачка служба однапред го информирала политичкото раководство на земјата дека Адолф Хитлер има донесено одлука да го нападне СССР на 22 јуни 1941 година, покажуваат документи на КГБ, на кои конечно им е симната ознаката ’тајно’.

Како што јави руската агенција Итар-тасс, за ова сведочат документите на советската разузнавачка служба КГБ од кои е симната ознаката за тајност, а кои вчера, на годишнината на почетокот на нацистичката инвазија врз Советскиот Сојуз, му се предадени на писателот и историчарот Теодор Гладков, кој пишува книга за легендарните разузнавачи од тоа време.

Во документите е наведено дека изворот на советската разузнавачка служба Вил Леман со псевдонимот Брајтенбах, на 19 јуни 1941 година го информирал агентот на КГБ во Берлин Борис Журављов дека е донесена наредба за напад врз Советскиот Сојуз на 22 јуни во три часот наутро. Истата ноќ, информацијата била предадена на Москва.

Леман е роден 1884 година во реонот на Лајпциг, во учителско семејство. Убедениот антифашист во 1911 година бил примен во берлинската полиција како обичен полицаец, но наскоро бил префрлен во контраразузнавачкото одделение.

За време на Првата светска војна се истакнал како способен контраразузнувач, а од 1929 година почнал да соработува со советската разузнавачка служба. Во декември 1942 година е стрелан од припадници на Гестапо, а точниот датум на неговата смрт не е познат.


Во мугрите на 22 јуни 1941 година фашистичка Германија го нападна Советскиот Сојуз. Само во првите денови од офанзивата германската авијација им нанесе тежок удар на аеродромите, железничките станици, воено поморските бази, воените единици и градовите во длабочина до 300 километри на територијата на тогашниот Советски Сојуз.
Во Втората светска војна загинаа повеќе од 26 милиони советски граѓани.