Издавачката куќа Харпер Колинс која ги има авторските права за цел свет над делата на Агата Кристи, ќе објави на почетокот на септември две непознати приказни од кралицата на крими романите со кои Херкул Поаро, најславниот детектив, повторно ќе оживее.

Сториите ги откри писателот Џон Кјуран додека ги проучувал 73 бележници кои ги напишала Агата Кристи од 1920 до 1976, пронајдени во нејзината куќа во Гринвеј, Девон.

Насловени „Мистеријата на кучешкото топче“ и „Заробувањето на Керберот“, овие приказни ќе се најдат во неговата книга „Тајните бележници на Агата Кристи: Педесет години мистерии во создавање“, која Харпер Колинс ќе ги издаде на почетокот на септември.


„Бележниците овозможуваат да се разбере работата на еден голем автор, како што беше Агата Кристи. Тие покажуваат дека писателката повторно ги користела своите идеи, понекогаш навраќајќи се десет години подоцна“, изјави по овој повод Дејвид Браун, еден од директорите на Харпер Колинс.

Кралицата на крими романите имала обичај да пишува кратки приказни на кои подоцна им се навраќала и ги развивала во долги романи.

Од „Мистеријата на кучешкото топче“ настанал романот „Молчаливиот сведок“ во кој богата наследничка настрадува на скалите сопнувајќи се на топчето од својот фокс териер, додека „Заробувањето на Керберот“ го напишала за да ги потполни „Херкуловите задачи“, збирка од дванаесетте последни авантури на Херкул Поаро.