На гала вечер во древниот град Плок, близу Варшава, изминатиов викенд е врачена наградата за најдобар туристички спот за $Македонија – вечна$ на Милчо Манчевски, освоена на Меѓународниот фестивал за туристички филмови и спотови.

’Македонија – вечна’ победи во конкуренција од над 30 кандидати од Европа, Азија и Африка. Во конкуренцијата меѓу другите беа и кампањите на Индија, Црна Гора, Грција и други. Овој фестивал е од големо значење за туристичката промоција на земјите, а организатор е Меѓународниот комитет за туризам.

Наградата на свеченоста во Плок ја прими Елена Станишева, една од продуцентите на спотот.

„Македонија ја доби првата награда за најдобар туристички спот, позиционирајќи се како земја чија богата историја е покана за туристите. Наградите ги додели жирито составено од експерти од Полска, Данска и Австрија, а на церемонијата на врачувањето присуствуваа и над 50 гости од целиот свет. Гала вечерта заврши со вечера и забава во замокот во Плок, кој бил стариот главен град на Полска. Иако трае само 60 секунди, спотот ’Македонија – вечна’ е резултат на скоро тримесечна макотрпна работа на голема екипа, а по Полска, спотот веќе е поканет на други слични фестивали, меѓу кои и во Португалија, Романија и други. Сето ова покажува дека целната група на спотот е погодена, и очекуваме ефекти во туризмот во иднина“, изјави Елена Станишева.

По повод наградата режисерот Манчевски изјави:

„Ова е веројатно еден мал доказ дека квалитетот понекогаш се вреднува.“

Спотот "Македонија - вечна" беше премиерно прикажан во декември минатата година кога предизвика бројни реакции. Се прикажува на Си-Ен-Ен и уште во десетина земји. Сајтот на спотот и бројните Интернет постови ги посетиле над половина милион гледачи.

Пред два месеци еден од најугледните туристички водичи во светот "Брад" пишуваше исклучително пофално за овој спот, подвлекувајќи: "Величествената реклама на Манчевски конечно ја претставува Македонија како рамноправна меѓу многуте одлични реклами за топ туристички дестинации".