Драстично намалени цени, попусти, бескаматни кредити, бесплатна дополнителна опрема - во последнава година заради рецесијата видовме секакви начини на кои автопроизводителите и дистрибутерите се обидуваат да ги привлечат потенцијалните купувачи, но последниот дефинитивно е најбизарен.

За секој купен Тритон, односно Mitsubishi L200, жителите на Нов Зеланд како подарок ќе добијат - коза. Да, да, добро прочитавте!

Идејата за ваквиот маркетиншки потег се обиде на новинарите да им ја објасни маркетинг менаџерот на Мицубиши, Питер Вилкинс, кој рече дека сушата на Нов Зеланд, која трае веќе три години, значително ја намалила популацијата на кози и говеда, па реторички се запраша дали има подобро време за една ваква акција.


„Козите ја унапредуваат продуктивноста на фармите, бидејќи ги штитат насадите од плевел, поевтини се од отровните материи и не постои ризик од козји грип, кој би му наштетил на туризмот“, рече Вилкинс.

На потенцијалните купувачи на кои не им треба коза, Мицубиши во замена им нуди пакет опрема која вклучува продолжен сервис на 5 години, односно 100.000 км, петгодишна помош на пат и 500 долари дополнителна опрема по избор.