Сакате да се исончате и во денови кога нема сонце? Постои решение! Револуционерна веб страна нуди бесплатен петминутен третман по кој ќе имате бронзен тен.

ComputerTan е револуционерна веб страна која целосно може вашиот монитор да го претвори во УВ ламба за сончање, а по петминутниот третман ќе имате посакуван бронзен тен.



Е, токму на овие зборови досега наседнаа над милион луѓе кои ја посетија веб страната со надеж дека по завршувањето на работното време ќе изгледаат како да стигнале од летување.

Фондацијата Карен Клифорд го смисли овој трик како дел од кампањата во борба против рак на кожата, а со цел да се запознае јавноста од последиците на долготрајното сончање и изложување на УВ зраци.

Онлајн ’сончањето’ завршува со следната порака на екранот: „Не дозволувајте да ве лажат - изложувањето на УВ зраци ќе ве убие!“.

Потоа следат предупредувања за опасност од рак на кожата, болест од која секој ден во Велика Британија умираат пет луѓе.

Во фондацијата се воодушевени од успехот на страната, што ја основаа роднините на Карен Клифорд, која почина пред четири години од рак на кожата.

Нејзиниот сопруг Ричард вели дека е тешко да се поверува во толкава наивност на луѓето и додава дека многу се жалеле кога откриле дека не се исончани.