Здружението на блогери на Македонија реагираше на зачестените написи во медиумите во кои се генерализираат македонските блогови и форуми како дувло на национал-шовинизам.

Изминатиов период голем број од медиумите изнесуваат информации во кој ги посочуваат блоговите и интернет форумите како ’легла на растечкиот национализам’ и ’шовинизам’.

Здружението на блогери на Македонија сака да ја информира македонската јавност дека во голем дел од овие натписи и репортажи се презентира една крајно поедноставена и неточна слика за блоговите и разните интернет форуми.

Самиот факт дека во Република Македонија над 95 проценти од корисниците на овие електронски медиуми говорат за теми кои и воопшто не се поврзани со политички и општествени теми, говори доволно!

Самата поента на блоговите и електронските форуми е да се стимулира дебатирањето за сите теми. Сите корисници на електронските форуми и блоговите се индивидуални личности и истите одговараат за своите постапки и искажани ставови, се вели во соопштението на ЗБМ.

Од Здружението сакаат да ја инфорираат јавноста дека слободата на изразување на сопственото мислење е едно од фундаменталните права на луѓето, па оттука ги повикуваат сите лица да продолжат со нивното слободно изразување на ставовите на нивните блогови и по интернет форумите.

Здружението на блогери на Македонија апелира до јавноста да не ги пресудува сите корисници на блогови и интернет форуми базирани на исказите и делата на мал број на индивидуални искази по однос на одредени теми.

Поради ова, се апелира до пишаните и електронските медиуми во нивните стории и прилози, да се воздржат од давање на глобални оцени поради делата на еден мал број на индивидуи.

Веб порталот Таратур изразува поддршка до Здружението на блогери на Македонија и ги осудува сите обиди на дел од медиумите да се замолчи критичната македонска мисла и да се генерализира Македонецот како национал-шовинист.