Црковен видео надзор

Освен Севишниот во италијанските цркви ќе гледа и сеприсутното око на сигурносните видео камери. Целта е оние што не се плашат од божјата казна, да се уплашат од земската.

Во италијанските цркви, на барање на свештениците, се инсталираат видео камери, со цел да се спречат кражби и напади врз верниците.

Некои верници го поздравуваат инсталирањето на видео надзор, кој ќе биде директно поврзан со полицијата и тврдат дека така ќе бидат посигурни. Други се противат, наведувајќи дека тоа ја попречува приватноста на молитвата во црквата.

Свештеникот во црквата Света Марија Гароти во Рим, Исидоро Мачин, рече дека чашата се прелила кога неодамна едно момче со рака удри 92-годишна верничка додека се молела сама во црквата, само за да и украде златно ланче и два прстена, спомен од покојниот сопруг, пренесуваат италијанските медиуми.

Старицата е однесена во болница со скршен нос и тешко повредено око.

Свештениците велат дека во црквите се случува истото што и на улица, но дека црквите се уште понебезбедни, бидејќи никој однадвор не гледа што се случува внатре.

Свештениците се почесто ги советуваат верниците никогаш да не остануваат сами во црква.