Елефтерос Типос: Скопје брка двојно членство со печат на Хаг

Скопје брка двојно челнство - во НАТО и ЕУ, со печатот на Хаг, пишува денеска грчкиот весник “Елевтерос Типос“, по повод предметот поднесен од Македонија против Грција пред Меѓународниот суд во Хаг.

Според изданието, намерата на Скопје станува јасна од текстот на барања на 11 страници, при што од судот се бара да признае дека Грција ги нарушила задолженијата што произлегуваат од член 11 на Времената спогодба.

„Скопје сака да и се нареди на Грција да ги направи сите неопходни чекори за да ги исполни своите задолженија и да престане да се спротивставува на членството во НАТО или во некоја друга меѓународна или регионална организација, на која што Грција е членка. Во барањето се повикуваат на член 21, според кој, секое несогласување во однос на спогодбата може да се предаде на Меѓународниот суд“, пишува Елефтерос Типос, како што пренесува Нетпрес.

Во веста на грчкиот весник се додава дека Скопје како аргумент го истакнува своето членство во ОБСЕ (1995), Советот на Европа (1995), Организацијата за борба против хемиското оружје (1997), Европската енергетска карта (1998) и Светската трговска организација (2003) со временото име ФИРОМ без да има приговор од страна на Грција.