Најпознатите светски автопроизводители Џенерал моторс, Форд, Опел и Фолксваген од своите држави бараат милијарди евра на заем. Доколку не добијат, ќе ги затворат своите погони и ќе отпуштат илјадници работници.
Светската автомобилска индустрија се наоѓа пред колапс поради слабата побарувачката на автомобилите ширум светските пазари.
Трите најголеми американски производители на моторни возила Џенерал Моторс, Форд, и Крајслер бараат од Конгресот да им се одобри 25 милијарди долари итен заем.
Бидејќи Конгресот минатиот месец веќе одобри заем од 25 милијарди долари за автомобилската индустрија и за други компании погодени од глобалната финансиска криза, сега алтернативата би била на автомобилските компании да им се позајмат пари од поранешниот одобрен план за развој на штедливи возила.
Доколку американската автоиндустрија не ги добие посакуваните пари, 2,5 милиони луѓе би можеле да останат без работа, а нивните погони низ цел свет да бидат затворени.
И германските автомобилски компании се соочуваат со истиот проблем и бараат помош од државата. Фолксваген, БМВ и Дајмлер наводно се договориле да побараат владини гаранции, а не финансиска инјекција, бидејќи со добивањето на гаранцијата се предвидува каматна стапка во просек од само два отсто годишно, што е многу помалку отколку кај комерцијалните кредити.
Најдалеку во молењето за пари отиде германскиот Опел, чии раководители вчера имаа состанок со канцеларката
Ангела Меркел. Оттаму бараат од државата барем милијарда евра заем.
Доколку Германија не го одобри заемот за Опел кој има 27.500 вработени, се заканува опасност компанијата целосно да пропадне.
Кризата не го одмина ни најголемиот производител на автомобили, јапонската Тојота, која предупреди дека годинешниот профит ќе биде најмал во последните 13 години. Соопштенија за падот на профитот стигнаа и од Нисан и Сузуки.
За настанатата криза на светскиот пазар аналитичарите, освен финансиската криза, делумно ја обвинуваат и јапонската автомобилска индустрија.
„Јапонците, пред се Тојота, со својата политика на непрекината флексибилност предизвикаа автоиндустријата да не може да се избори со кризата. Сега последиците на таквата политика тешко се поднесуваат“, сметаат аналитичарите.
18.11.2008
Како што објави Меѓународниот фудбалски институт за статистика, англискиот и европски шампион е најдобриот фудбалски клуб во 2008 година.
