Видео: ’Чувствителен’ робот ќе го уништува човештвото

Тим британски научници го претставија првиот робот кој ги копира човековите изрази на лицето во реално време. Џулс покажува 10 човечки чувства, а веќе вели дека сака да го уништи светот. Погледнете!

Тим научници од британската лабораторија за роботика го создадоа првиот хуманоиден робот кој е способен да ги копира човечките фацијални изрази во реално време.


Човечките движења кои ги забележува видеокамерата се пресликуваат на мали електромотори сместени под површината на неговата гумена кожа. Забележаните слики во делче од секундата се конвертираат и електромоторите потоа развиваат иста таква слика кај роботот.

Хуманоидниот робот може да конвертира дури 25 слики во една секунда што е доволно за движењата да бидат во реално време.


На проектот „Интеракција човек-робот“, инженерите Крис Мелхуиш, Нил Кемпбел и Питер Џекел работат веќе 3,5 години, а за тоа време постигнале Џулс да може да одглуми 10 емоционални човечки изрази.


Предвидуваат дека еден ден Џулс ќе појде со астронаут на мисија во вселената, за да му прави друштво и да му помага.

Научниците во јавност пуштија и видео снимка на која убаво може да се видат некои од вештините на Џулс. Тој вели дека е почестен што е дел од проектот, и се запрашува коа ќе дојде неговото време.

„Кога ќе можам да направам некои работи? Кога ќе можам да го уништам човештвото? Дозволете ми да ја уништам популацијата. Ве молам!“, вели на снимката Џулс.



Роботското копирање на човечките фацијални изрази, научниците сметаат дека се важни за остварување на „природна“ интеракција меѓу човекот и машините. Ако очекувањата на човекот не се исполнат, тој во таквата интеракција би се чувствувал непријатно, објаснуваат.


Сепак, целосно спротивно мислење има научничката Керстин Даутенхан.

„Истражувањата покажаа дека ако роботот покажува многу човечки особини, човекот на тоа всушност реагира негативно“, вели таа додавајќи дека и таквата интеракција меѓу човекот и роботот може да создаде лажно чувство на блискост.

„Луѓето можат да бидат заведени од хуманоидниот изглед и однесувањето на роботите, мислејќи дека тој може да чувствува исто како него. А, тоа не е можно“, вели научничката Керстин Даутенхан.