Македонија денеска го празнува Денот на револуционерната борба – 23 Октомври. На денешен ден во 1893 година во Солун се поставени темелите на Македонската револуционерна организација.

На 23 октомври 1893 година (стар стил) во станот на секретарот на Солунската егзархиска црковно-училишна општина Христо Батанџиев се одржа првиот состанок на МРО.

На него присуствувале: Д-р Христо Татарчев – лекар, родум од Ресен, Даме Груев – професор, родум од с. Смилево - Битолско, Петар Поп Aрсов – професор, родум од с. Богомила - Велешко, Иван Хаџи Николов – книжар во Солун, родум од Кукуш, Антон Димитров – учител, родум од с. Ајва-тово - Солунско и домаќинот Христо Батанџиев – професор, родум од с.Гуменџе, Ениџе Вардарско.

Заеднички размениле мисли за идната „политичка работа“. На средбата била разгледана општата ситуација во Македонија. Тие констатирале дека положбата на населението во Македонија е неподнослива. За нејзино подобрување била потребна „една планомерна и сериозна акција“.


Во своите спомени Иван Хаџи Николов пишува:

„Во договореното време на 23 октомври 1893 година, во петокот навечер, сите шестмина се собравме во живеалиштето на Христо Батанџиев. Јас ја објаснив целта на нашата средба дали не е време да се основа револуционерна организација, каква треба да биде нејзината тактика и нејзиното политичко верују, кои ќе имаат право да членува-ат во неа, и какви треба да бидат нејзините односи со македонската емиграција што се наоѓа надвор од територијата на Македонија и сл.

Поставените прашања беа предмет на разгледување од нас шестмината, но најподробно и најопширно се искажа д-р Христо Татарчев. На крај дојдовме до следнава согласност:

1. Организацијата треба да биде тајна и револуционерна,
2. Нејзината територија ја сочинува само Македонија, во нејзините географски и етнографски граници, поради што ќе се нарекува и внатрешна,
3. Во неа ќе членуваат лица родени и што живеат во Македонија, без разлика на вера и народност,
4. Политичкото верују на организираните Македонци е: автономија на Македонија и
5. Да се запазува самостојноста на Организацијата, за да не падне под влијание на политиката на владите на соседните држави....
За проширувањето на кружокот и за привлекување на сомисленици, на крај решивме секој еден од нас да ги посветува во револуционерната идеја своите најблиски луѓе во Солун и провинцијата....“


Нека ни е честит празникот Македонци!