Официјално Скопје засега нема реакции во врска со последниот пакет идеи за решавање на разликите со Грција околу името, што медијаторот Метју Нимиц ги достави во средата.
Извори во Владата и во кабинетот на шефот на државата не беа достапни за информација што Макфакс се обиде да ја добие.
Државниот врв не изгради единствен став на консултациите пред последната рунда преговори што Нимиц ја одржа неделава во Њујорк.
На прашање дали неусогласената позиција на македонскиот државен врв негативно се одразила на преговарачкиот процес, Нимиц одговори дека тоа се внатрешни прашања што немаат не влијание врз процесот што го води.
„Мојата задача е да се бавам со преговорите меѓу две земји, држави членки во Обединетите нации“, изјави Нимиц во средата во Њујорк.
Официјална Атина вчера го соопшти ставот дека идеите на Нимиц ги проценува со „внимание и конструктивен приод“ и ќе го извести за своите заклучоци во скоро време.
Конзервативниот атински весник „Катимерини“ објави денеска дека првата грчка реакција на предлогот на Нимиц е позитивна. Според весникот, на предлогот на Нимиц позитивно се гледа и во Скопје.
Предлогот на Нимиц го вклучува името „Република Северна Македонија” за меѓународна употреба, а уставното име на Македонија за внатрешна и за употреба во билатералните односи со трети страни, кои ќе одлучат да го користат името Република Македонија, наведува „Катимерини’“.
Во пасошите се предлага името да биде испишано на три начини: Republic of Northern Macedonia, Republic of Macedonia, Republika Makedonija.
Весникот посочува дека дел од предлогот на Нимиц, што може да предизвика незадоволство во Атина, е јазикот да биде наречен “македонски”.
Copyright 2008 makfax Сите права се задржани. Текстов не смее да се печати или емитува, во целина или во делови, без договор со makfax.
9.10.2008
Како што објави Меѓународниот фудбалски институт за статистика, англискиот и европски шампион е најдобриот фудбалски клуб во 2008 година.
