Видео: Меси ја спасуваше Барселона, победа на Спортинг

Каталонците со головите на Меси во самата завршница славеа со 2:1 против Шахтјор, додека Спортинг со 2:0 беше поуспешен од Базел.

Првата прилика на натпреварот ја имаше Анри, но неговиот удар беше одбранет од Пјатов. На спротивната страна стопроцентна прилика не искористи Илсињо или подобро кажано одбрани Валдес. Сепак, на одморот се замина со предност на Шахтјор, а најзаслужен за тоа беше Илсињо кој при една акција му побегна на Пујол и погоди преку Валдес.

Во продолжението голема шанса за израмнување пропушти Ето, а во самата завршница следуваше вистинска драма!

По уфрлувањето од Кркиќ голманот Пјатов направи кардинална грешка, а Меси без потешкотии ја уфрли топката во голот за израмнување на резултатот. Славењето сеуште не стивна, а Барса дојде до водство од 2:1. Се играше четвртата минута од продолжението кога Чави испрати идеална топка до Меси кој во манир на голем играч го префрли противничкиот голман за победа на Барселона.

Спортинг доминираше против Базел, а подобрата игра ја капитализираше во второто полувреме. Ромањоли среќно го постигна водечкиот гол во 55 минута, а конечните 2:0 ги постави Дерлеи во самата завршница на натпреварот.