Видео: Реми на Интер и Вердер, Анортозис не се шегува

Натпреварот на Џузепе Меаца заврши без победник 1:1, додека Анортозис сосема неочекувано, но оправдано го прегази Панатенаикос со 3:1.

Интер поведе во 13 минута со голот на Маикон кој се уфрли од втор план и рутински го совлада Висе. Вердер успеа да воспостави теренска рамнотежа, а најдобрата шанса за израмнување ја пропушти преку Пизаро во самата завршница на првиот дел кога од само неколку метри напаѓачот успеа да ја погоди стативата. Сепак, Пизаро беше прецизен во 62 минута кога од другата страна на стативата ја уфли топката во мрежата по одличното уфрлување на Озил.

Интер по изедначувањето тргна кон победа, а најблизу до гол беше Маикон, но неговиот удар заврши во стативата. Потоа својот удар го испроба Хулио Круз, но Висе беше сигурен на голот.

Во судиското продолжение Налдо топовски изведе слободен удар, а одбиената топка Пизаро не успеа да ја пикне во празната мрежа. Натпреварот заврши без победник 1:1, што е и најреален резултат по прикажаната игра на теренот.

Анортозис уште еднаш покажа квалитет, а тоа на своја кожа најдобро го почувствува Панатенаикос. Се играше 11 минута кога по нафрлената топка од страна Сариеги си постигна автогол за водство на домашните. Само четири минути подоцна Савио помина по левата страна и прекрасно центрираше, а Добрашиновиќ со глава погоди за 2:0.

Панатенаикос до полувремето успеа да намали со голот на Салпингидис кој искористи пенал, а големата победа на Анортозис ја завери Тахер со погодок во 78 минута по изведениот удар од аголот.