Разликите за прашањето околу името меѓу шефот на македонската држава и македонскиот премиер, синоќа се потврдија на заедничкиот координативен состанок, по средбите на претседателот во Њујорк.
“Очигледна е намерата на Груевски да се избегне каква било одговорност и да се остави медијаторот Нимиц на еднострано влијание и корекции само од грчка страна во овој многу важен период, со што се создава амбиент за многу полош предлог за Република Македонија“, изјави претседателот Бранко Црвенковски.
Според шефот на државата, премиерот Никола Груевски има несериозен пристап и избегнува одговорност во врска со ова прашање.
“Само со заеднички напори и со поделена одговорност меѓу претседателот и премиерот на државата ќе има надеж за позитивен исход“, изјави по средбата Црвенковски.
Според премиерот, пак, шефот на државата “настојува, а и понатаму ќе настојува, сопствениот политички рејтинг и неговата идна политичка кариера да ја гради врз основа на прашањето за името“.
“Зачудени сме од денешната нервозна и штетна за државата реакција на г. Црвенковски“, се наведува во соопштението од Кабинетот на премиерот Груевски, објавено синоќа.
“Тоа за нас во најмала рака е неодговорно. Ова се времиња кога треба да бидеме сериозни и да покажеме одговорен однос кон државата и нашите граѓани“, се додава во соопштението.
Шефот на државата, од своја страна, оцени дека ако нема напредок во наредните две-три седмици, преговорите ќе влезат во најмалку едногодишен мораториум, а Македонија ќе стагнира во ЕУ и НАТО интеграциите.
Copyright 2008 makfax Сите права се задржани. Текстов не смее да се печати или емитува, во целина или во делови, без договор со makfax.
30.09.2008
Како што објави Меѓународниот фудбалски институт за статистика, англискиот и европски шампион е најдобриот фудбалски клуб во 2008 година.
