Откриена планета која кружи околу сонце слично на нашето

Научниците за првпат снимија планета надвор од нашиот сончев систем која кружи околу ѕвезда слична на нашето Сонце.

Ѕвездата 1РХС Ј160929.1-210524 и новооткриената планета се наоѓаат надвор од Сончевиот систем, на одалеченост од оклу 500 светлосни години од Земјата.

Тројца научници од Универзитетот во Торонто ги снимија ѕвездата и планетата со помош на телескоп кој се наоѓа во набљудувачницата Гемини, на Хаваи. Давид Лафрение, Реј Џајавардхана и Мартен Х. Ван Керквијк, резултатите од своето истражување ги објавија во Национал Географик.

„Ова е прв пат да видиме ваква планета, надвор од сончевиот систем, која кружи во орбита околу ѕвезда слична на нашето Сонце. Засега не можеме со сигурност да потврдиме дали планетата со ѕвездата е поврзана со гравитација, а ако успееме во тоа, ќе биде тоа голем чекор напред“, вели Давид Лафрение, еден од научниците.

Новооткриената планета се наоѓа на голема оддалеченост од ѕвездата – дури 330 пати поголема од таа меѓу нашата Земја и Сонцето. За споредба, една од најдалечните планите во нашиот Сончев систем, Нептун е само 30 пати пооддалечена од Сонцето.

Д-р Мет Бурли од британскиот Универзитет во Лестер вели дека пронајдената планета е „многу добар кандидат за прва планета надвор од Сончевиот систем, која во орбитата кружи околу некоја ѕвезда“. Тој за Би-Би-Си рече дека сега е потребно само да се докаже дека ѕвездата и планетата заедно патуваат низ вселената.

Докажувањето на тоа, би можело да потрае и до две години. Засега е познато дека планетата е осум пати поголема од Јупитер и дека многу потопол од него, со температури од 1.500 степени целзиусови. Овие разлики, ја прават планетата непогодна за живот, иако има наоди за присуство на вода и јаглерод моноксид во атмосферата.