Пронајден главниот град на Хазарскиот хаганат

По девет години работа, руските археолози на брегот на Каспиското езеро го пронајдоа одамна загубениот главен град на Хазарите, кои своевремено владееја со јужните делови на Русија.

„Ова е големо откритие”, рече организаторот на експедицијата Дмитриј Васиљев од Астраханскиот државен универзитет по враќањето од наоѓалиштето во близина на селото Самосделка на брегот на Каспиското езеро.

„Сега можеме да ја разјасниме една од најголемите мистерии од тој период - како живееле Хазарите. Многу малку знаеме за нив, за нивните обичаи, погребни обреди, културата”, рече Васиљев.

Станува збор за главниот град на Хазарите, полуномадски народ кој ја прифатил еврејската религија како официјална вера во периодот меѓу 8. и 10. век, кога ги покориле владетелите на древна Русија.

Во својот врв хазарската држава контролирала поголем дел од денешна јужна Русија, западен Казакстан, источна Украина, Азербејџан и големи делови на севернокавкаското подрачје.

Во арапските хроники градот се споменува под името Итил, но Васиљев вели дека ова име веројатно ја означувало Волга на која бил изграден градот или подрачјето околу делтата.

Итил наводно бил мултиетнички град чии жители биле од еврејска, христијанска, муслиманска и паганска вера, а неговите остатоци никогаш не се пронајдени, за кои се верувало дека ги поплавило Каспиското езеро.

Археолозите истражуваат на подрачјето на Самосделка изминативе девет години, но дури сега собрале доволно докази, што ја поддржуваат нивната теза, вклучувајќи ги и остатоците од древната тврдина од цигли.

„Внатре во тврдината пронајдовме колиби слични на јуртите, кои се типични за хазарските градови... Тврдината има триаголен облик и била изградена од цигли. Тоа е уште еден доказ дека не станува збор за обичен град.”

Во ископувањата летово учествуваа околу 10 универзитетски археолози и 50 студенти, а делумно беа финансирани од Еврејскиот универзитето во Москва и Рускиот еврејски конгрес.