Апсолутен рекорд: 4,7 милијарди луѓе ги гледале ОИ

За 17 дена, ТВ преносите од Олимписките игри во Пекинг ги следеле околу 4,7 милијарди луѓе, што е нов апсолутен рекорд, соопшти денеска компанијата за истражување на пазарот Нилсен.

Податоците за гледаност на олимписките натпреварувања на најдобрите спортисти во светот ги изненади стручњаците, бидејќи се работи за скок од дури 20 отсто во однос на ОИ во Атина, кои ги следеа околу 3,9 милијарди луѓе. ОИ во Сиднеј беа гледани од околу 3.6 милијарди луѓе.


Во извештајот се наведува дека 94 отсто од вкупно 1,3 милијарди Кинези гледале некој од ТВ преносите, ист процент е забележан и во Јужна Кореја, а само еден отсто помалку гледаност е забележана во Мексико.



Убедливо најмногу гледаност од 2,1 милијарда луѓе е забележана за време на свеченото отворање. Спектаклот во директен пренос во Азија го следел секој втор човек, во Европа скоро третина од популацијата, а во Северна Америка 24 посто од населението.