Блуз и џез на новиот албум на Влатко Стефановски

Пред најблиските колеги и пријатели, вчера Влатко Стефановски го промовираше новиот блуз албум на неговото Трио „Thunder from the blue sky“.

Специјално за одбраната публика Триото (Влатко Стефановски, Ѓоко Максимовски и Дејан Милосављевиќ) покажа уште еднаш со својата енергичната и моќна изведба, дека блузот е дел од нивната душа. Токму онака како што треба да звучи блузот.


Долго најавуваниот албум, инспириран од корените на блузот и џезот, внесува една нова нишка во музичкото дело на Влатко Стефановски. Издавач на новиот албум е „Езотерија Рекордс“.

„Конечната реализација на овој албум е сублимат на внатресниот набој, стандардните блуз шаблони се само жанровска определба, бидејќи во различни стилски определби на Влатко има многу ’Blues feeling’ кој добрите познавачи на музиката го препознаваат во секоја нота. Овој албум на Влатко ке му отвори нови врати за докажување на светската музичка сцена, во што не треба да се сомневаме, рече Васја Ивановски, еден од најдобрите познавачи на светската блуз сцена на балканските простори.


На цедето се наоѓаат 15 песни, од кои 13 се обработки и две авторски композиции на Влатко, меѓу кои и насловната тема. Меѓу обработките се „Dizzy Fingers“ од Edward „Zez“ Confrey, „What`d I say“ од Ray Charles и „Hoochie Coochie Man“ од Willie Dixon.

Како гостин на албумот се појавува Холанѓанецот Јан Акерман, еден од највлијателните рок-гитаристи во историјата. Втор гостин е нашиот познат музичар, клавијатуристот Дамир Имери.

„Со ’Thunder from the blue sky’ сакав да се навратам и да покажам респект кон музиката со која растев. Блузот е мајка на џезот и на рокенролот и без тие три магични акорди, тешко е да се се свири било што. Знам дека блузот не настанал во Македонија, но со малку труд и среќа во ова време на глобализација, не е чудо да станеме извозници и на блузот“, вели Влатко Стефановски за својот најнов проект.