Прославениот американски филмски режисер, продуцент и актер, добитник на два Оскари за епската романса Моја Африка, почина вчера во 74 година од рак, кој му беше дијагностициран пред 10 месеци.
Сидни Полак во 1985 година освои два Оскари за продукција и режија на филмот Моја Африка со Роберт Редфорд и Мерил Стрип во главните улоги.
Филмот беше номиниран за единаесет Оскари, а освои вкупно седум.
Тој ќе остане запаметен и по режијата на филмот Тутси, со Дастин Хофман, The Way We Were со Роберт Редфорд и Барбра Стрејсенд во главните улоги.
Иако се прослави со режијата, Сидни ја почна кариерата како актер, со што не прекина да се занимава во целиот живот.
Последниот филм во кој глумеше беше минатогодишниот хит Мајкл Клејтон.
Од самиот почеток кариерата му беше поврзана со големи имиња и големите студија на Холивуд.
Соработуваше со Сидни Поатје, Ен Бенкрофт, Берт Ланкастер, Џејн Фонда, Роберт Мичам, Ал Пачино, Том Крус, Харисон Форд и Никол Кидман.
27.05.2008
