Видео: Зенит го освои Купот на УЕФА

Најпријатното изненадување сезонава во Купот на УЕФА, Зенит со головите на Денисов и Зирианов го совлада Глазгов Ренџерс со 2:0 и потполно заслужено го освои најмасовното фудбалско натпреварување.

Навивачите на Зенит и Ренџерс придонесоа за навистина прекрасната атмосфера, а фудбалерите на теренот прикажаа игра достојна за едно финале.

Првата прилика на натпреварот ја имаше Зенит, но ударот на Аршавин заврши во надворешниот дел на мрежата. На другата страна Дарчевил успеа да нафрли пред голот, а одбраната на Зенит во последен момент ја отстрани опасноста.

Ренџерс играше само со еден напаѓач и воглавно беше определен да го зачува својот гол, додека Зенит со својата отвореност константно го напаѓаше голот на противниците.

Во продолжението прв се закани Ренџерс преку Дарчевил, но Малафеев со одлична интервенција го спаси голот. Зенит успеа да возврати преку својот најдобар играч Аршавин кој биеше кон празната мрежа, а Папац на самата гол линија спречи сигурен погодок.

Моментот на одлука се случи во 72 минута кога Аршавин сјајно го пронајде Денисов кој излезе сам пред голманот Александер и рутински погоди за водство на Русите од 1:0.

Неколку минути потоа Зирианов можеше да ги разреши сите дилеми, но неговиот удар од непосредна близина заврши право во стативата.

Волтер Смит го заврши натпреварот со три напаѓачи, а Ново во последните минути имаше голема шанса кога од непосредна близина биеше високо над пречката од голот на Зенит.

Конечните 2:0 ги постави Зирианов во судиското продолжение кога само ја пикна топката во голот откако доби идеална асистенција од Теке.

Зенит беше подобар од Ренџерс и неговите фудбалерите сосема заслужено го кренаа пехарот наменет за победникот на УЕФА купот.

Головите


Славењето:



Филип Крстевски/Таратур