Адолф Хитлер и Сталин се ставени во ист кош според ОБСЕ, чија резолуција ги осуди и нацизмот и сталинизмот како тоталитарни режими од кои произлегоа геноциди, кршење на човековите права и злосторства против човештвото. Русија протестираше, Германија не!

Парламентарното собрание на ОБСЕ ја разгневи Москва, откако во иста резолуција ги осуди нацизмот и сталинизмот, за која руската делегација одби да гласа.

Парламентарните претставници во ОБСЕ со големо мнозинство го прифатија документот, што го предложија Литванија и Словенија, две поранешни комунистички земји.

Руската делегација остро се спротивстави на какви било обиди „во ист кош“ да се стават режимите на Адолф Хитлер и Јосиф Висарионович Сталин и пред гласањето за резолуцијата ја напушти салата.

Пред тоа, Русите неуспешно се обидоа да влијаат за повлекување на документот.

Во Резолуцијата, меѓу другото, е наведено дека „во текот на 20 век, европските земји минале низ два големи тоталитарни режими, нацизам и сталинизам, од кои произлегоа геноциди, кршење на човековите права и основните човекови слободи, воени злосторства и злосторства против човештвото“.


Советскиот сојуз под Сталин беше виновен како и Нацистичка Германија за Втората светска војна, се заклучува во резолуцијата од ОБСЕ што ја налути Русија која загуби 26 милиони луѓе во војната и чии војници први го освоија Берлин.

Резолуцијата се базира на пактот Рибентроп-Молотов од 1939, за кој се смета дека бил одлична основа за почеток на војната.

Имено, пактот кој го потпишаа министрите за надворешни работи на СССР и Нацистите ја подели Полска меѓу Москва и Берлин и предвидуваше ненапаѓање на двете земји.

Москва се придржуваше на овој договор, додека Германија ја освојуваше западна Европа, а влезе во војната дури откако Хитлер се реши да го прекрши договорот и да го нападне СССР.