Момче исценирало кражба на пари и накит во семејната куќа во Тетово, со намера да си купи автомобил и да оди на одмор, јавува дописникот на Макфакс.

Според истиот извор, СВР Тетово ја расветли кражбата од 27-ми минатиот месец, извршена во куќата на 46-годишeн тетовчанец, на улица „Борис Кидрич’’, кога беа одземени пари и златен накит во вкупна вредност од околу 13.200 евра.

Парите и златото воопшто не ги одзеле четири непознати лица, како што беше пријавено од сопственикот на куќата, туку неговиот 19-годишен син.

Имено, вечерта помеѓу 22 и 22 часот и 40 минути, синот најпрво ја смислил, а потоа и целосно ја исценирал кражбата.

Тој го скршил стаклото од балконската врата, влегол во внатрешноста и од неколку соби и потпокривот ги одзел парите и накитот што ги поседувал татко му, веднаш ги сокрил во подрумот, по што набрзина излегол пред куќата и започнал да пука со гасен пиштол по четворица непознати, кои наводно ги видел дека провалиле во куќата.

Одземените пари и златниот накит подоцна се пронајдени во подрумот на куќата, а сторителот ќе се соочи со соодветен поднесок за лажно пријавување на кражбата.