Организацијата “Фридом хаус“ оцени дека демократскиот развој во Македонија, исто како и во Србија, Црна Гора, и Албанија е стабилен, додека во Хрватска и во Босна и Херцеговина е “забележан одреден пад во демократските слободи“.

“Фридом хаус“ во својот вчера објавен 13-ти извештај “Нациите во транзиција“, кој опфаќа 29 држави, оцени дека минатата година била лоша за развојот на демократијата.

“Во 18 држави демократските процеси се во пад, а во осум се ’зацврстиле авторитарни режими’. Негативните процеси се далеку посилни отколку претходно, а позитивните трендови се слаби“, се вели во извештајот.

Во извештајот се наведува дека повторно се покажува дека новинарството е најзагрозена професија од Хрватска до Узбекистан, како и тоа дека владите на овие држави ги тресат скандали поврани со корупција, особено во Бугарија, како и убиства и напади на претставниците на медиумите во Хрватска.

“Фридом хаус“ оценува дека БиХ е поделена со националните политики на владеачките партии, а дека Црна Гора минала низ период на бојкот во парламентот, додека украинските лидери покажале целосно отсуство на политичка одговорност.

“Новите членки на Европската унија стагнираа во спроведувањето на реформите, а особено загрижува слабеењето на цивилниот сектор“, се наведува во извештајот на “Фридом хаус“.

Најлош рејтинг - 4,25 од можен најлош седум, Македонија има за слободата на медиумите и корупцијата, а овој рејтинг го има од 2004 наваму.

Во однос на корупцијата, се нагласува дека земјата иако има висок негативен коефициент, бележи подобрување во однос на 2008 и 2007 година, кога имала коефициент 4,50, односно 4,75.

Во 2009 според Фридом Хаус можни се превирања во владејачката коалиција, кои ќе се одразат преку притисок врз албанскиот коалиционен партнер за напуштање на коалицијата. Меѓуетничките односи во земјата може да бидат загрозени од влијанието од Косово кое во 2008 прогласи независност.

Владата ќе биде под притисок да направи поголеми економски реформи и да оствари повисок економски раст, додека евроатлантските интеграции и процесите поврзани со тоа се очекува да придонесат за стабилизација на земјата.