Поранешниот шпански репрезентативец е осомничен дека бил член на меѓународен синџир на шверцери на дрога. Хозе Луис Каминеро помагал при внесувањето на големи количини кокаин во татковината.

Познатиот шпански фудбалер е меѓу 31 уапсени лица во текот на акцијата спроведена во понеделникот, но по сослушувањето е пуштен, затоа што се проценило дека не постои опасност од бегство.

Хозе Луис Каминеро наводно е член на група осомничена за шверц на 500 килограми кокаин од Мексико и Колумбија, како и за перење на два милиони евра во Шпанија.

Каминеро во дресот на Атлетико Мадрид освои двојна круна во сезоната 1995/96. Во богатата кариера од 1989 до 2004 одигра вкупно 408 прволигашки натпревари, а за Шпанија одигра 21 меч и забележа осум погодоци.

На Мундијалот во 1994 год во САД, беше најдобар стрелец на шпанската репрезентација со три постигнати гола.