Американскиот претседател Барак Обама ужива најголема доверба кај граѓаните во светот, додека пак иранскиот претседател, Махмуд Ахмадинеџад и рускиот премиер, Владимир Путин се најмалку популарни помеѓу светските лидери, покажа американска анкета за јавното мислење спроведена во 20 земји.

Според анкетата која опфати скоро две третини од светската популација, 62 отсто од луѓето имаат доверба дека Обама ќе постапи исправно во светските прашања.

Зад него следи германската канцеларка Ангела Меркел којa ужива доверба од 40 отсто, а недоверба на 38 отсто од светското население.

Најнизок рејтинг, поточно 28 отсто поддршка има иранскиот лидер Ахмадинеџад, додека пак рускиот премиер ужива доверба од 34 отсто, а недоверба од 50 отсто.

Инаку, ниеден лидер освен Обама не доби поголема поддршка од 40 проценти, пренесе Ројтерс.

„Обама во овој момент има единствена позиција во очите на светската јавност“, изјави Стивен Вебер од Ворлд Паблик Опинион, организација при Универзитетот Мериленд која ја спроведе анкетата.

Генералниот секретар на ОН Бан Ки Мун ужива релативно голема поддршка од скоро 40%, додека Саркози го подобри рејтингот од минатата година и сега ужива доверба од 34%.

Анкетата е спроведена во Кина, Индија, САД, Индонезија, Нигерија, Русија, Мексико, Германија, Велика Британија, Франција, Полска, Азербеџан, Украина, Кенија, Египет, Турција, Ирак, на палестинските територии и во Јужна Кореја.