Вицепремиерот за европски прашања Ивица Боцевски денес поднесе неотповиклива оставка на својата функција. Премиерот Груевски ја прифати оставката и изрази благодарност за досега сработеното.

Во писмото упатено до премиерот Груевски, заменик претседателот на Владата на Република Македонија, Ивица Боцевски му се заблагодарува за честа и одговорноста, но тврди дека неговиот придонес веќе е целосно исцрпен.

„Секоја генерација има своја битка за Македонија, а на мојата генерација и припаѓа обврската да се избори за европска и евро-атлантска Македонија. Јас ја имав должноста да бидам предводник на овој генерациски проект во Вашата Влада, што за мене претставуваше врвен патриотски чин.

Сепак, мојот придонес во актуелната Влада веќе е целосно исцрпен и затоа Ве известувам дека денеска поднесувам неотповиклива оставка на функцијата заменик на претседателот на Владата на Република Македонија задолжен за европски прашања.“

Владата информираше дека премиерот Никола Груевски изрази благодарност за досегашната соработка и задоволство од начинот на кој што потпретседателот Боцевски го водеше Секретаријатот за европски прашања. Соработката и меѓусебната комуникација со г-динот Боцевски ќе продолжи и понатаму на различни нивоа, соопштуваат од македонската влада.