Бразил во полуфиналето од Купот на конфедерациите квалитетно се намачи против домаќините на СП 2010. Мирисаше на уште едно изненадување, но тогаш во 87 минута ’опали’ офанзивниот десен бек на Барса. Погледнете!

Со заглушувачката и иритантна бучава вувузела, навивачките рогови кои ги користат јужноафриканските навивачи, натпреварот почна во лесна доминација на домашните. Иако немаа изразити прилики, често беа пред голот на Цезар, а во 22 минута опасно се закани Мокоена.

Бразилците возвратија преку Кака во 37 минута, но новопечениот реаловец шутираше покрај голот. Пред одморот и Пиенар се закани од далечина, но голманот на Интер одлично одбрани.

Бразил по час игра конечно стана поактивен, но ни оддалеку не доминираше. Напротив, неутралните навивачи очекуваа ново изненадување. А, во најмала рака се очекуваа продолженија.

Но, токму во последните мигови од средбата, откако влезе во 80 минута, Дани Алвес доби одлична можност да се покаже од слободен удар. И покажа дека има одлично чувство за таква задача!



Со голот на бекот на Барса, Бразил ќе игра против САД в недела, додека пак ЈАР и Шпанија ќе играат за утешното трето место.