Македонците повеќе сакаат ’домашно зготвено’, отколку да јадат во ресторан, покажа новото истражување на ГФК Скопје. Воглавно сакаат да јадат во склоп на семејството, но и самите да готват.

Резултатите покажуваат дека најголемиот дел од нашите сограѓани – 45% се понаклонети кон домашната кујна. Само 16% преферираат ресторанска храна, додека на 39% тое не им прави разлика.

Дури 76% од редовните оброци нашиот народ ги јаде дома, а 24% надвор од дома. Тоа повеќе важи за жените – во 80% од случаите, отколку за мажите, како и за граѓаните на помалите градови (до 2000 жители) – 82%.

Драстично од просекот отскокнуваат самовработените граѓани и оние кои се уште учат, кај кои бројот на оброци конзумиран надвор од домовите е помеѓу 60% и 65%.

Во другата насока, од просекот се разликуваат пензионираните граѓани и домаќинките, со околу 90% од оброците конзумирани во домот. Она што е интересно е дека нешто почесто од просекот, граѓаните кои се вработени, но не со полно работно време, јадат надвор од дома.

Истражувањето покажа и дека Македонците воглавно сакаат да готват, но жените се истакнуваат во поголем процент отколку мажите.

Исто така, во студијата на ГФК се потенцира дека македонските граѓани претпочитаат да јадат заедно со останатите членови на семејството (54%), 39 посто тоа го прават ретко, а само 7% никогаш не успева да седне на маса заедно со неговите блиски.

Очекуван податок е дека колку е помал градот, толку е поголем процентот на луѓе кои оброците ги делат со семејството, што најмногу се гледа кај најмалите градови (оние помали од 2000 жители) каде овој процент достигнува дури 70%.

Иако изгледа дека рестораните и сендвичарите се секогаш полни оваа анкета покажува дека најчест избор на граѓаните е домашната кујна, самостојно подготвениот топол оброк, консумиран во друштво на домашните.

Ова не важи за помладите кои повеќе сакаат „брза храна“, покажа анкетата за ГфК Скопје, спроведена во април годинава на репрезентативен примерок од 1050 граѓани постари од 15 години.