Супстанцата која инаку е позната како средство за подмладување на богатите и славните би можела да помогне во уште еден проблем на стареењето. Откриено е дека ботоксот дава добри резултати и во регенерацијата на косата.

Доктор Симон Оуриан е пластичен хирург од Беверли Хилс, кој тврди дека открил лек против ќелавост.

На откритието наишол сосема случајно, додека на својата мајка и вбризгувал ботокс, што се користи и како лек против мигрена.

Мајката на Оуриан примала хемотерапија поради која и отпаднала целата коса, а по третманите со ботокс било забележано неверојатно закрепнување и раст на косата.

По откритието д-р Оуриан ја испитал оваа теорија на уште тројца доброволци, додавајќи мешавина од витамини за резултатот да биде уште подобар.

„Витаминската инекција на ботокс за ќелавост делува подобро од било која техника што досега сум ја видел“, вели Оуриан.

Според него, ботоксот ги опушта мускулите и ги шири крвните садови овозможувајќи на хранливите материи полесно да допрат до неактивните фоликули на косата.

Доколку неговите тези се потврдат во научни истражувања, ботоксот би можел да биде решението кое ќелавите луѓе ширум светот желно го очекуваат.

„Ме изненади резултатот, поради што одлучив своето откритие да го поделам со пациентите“, вели доктор Оуриан.