Најголемата тајна на автомобилистичкиот свет конечно е откриена. Идентитетот на службениот возач на Top Gear, познат само под таинственото име The Stig е откриен во последната емисија. Михаел Шумахер!

Седумкратниот Формула 1 шампион ја тргна белата кацига за време на интервјуто со водителот Џереми Кларксон, по рекордното завршување на официјалната патека на Top Gear, најбрзо во историјата на емисијата за 1 минута и 10.7 секунди.

Стиг, чиј идентитет отсекогаш е мистериозен, во емисијата ги тестира автомобилите до самите граници на издржливост, со што стекна углед на одличен возач. Но, покрај тоа го следи и глас на добар учител бидејќи секоја недела ги подучува познатите личности како да возат ’разумно евтин автомобил’.

Неговиот идентитет е строго чувана тајна иако цело време се појавуваат шпекулации кој е под белото одело. На почетокот на годинава, излезе информација дека Стиг е професионалниот каскадер и возач на Ле Манс, Бен Колинс, но Би-Би-Си никогаш не ја коментираше оваа шпекулација.

Оригиналниот ’црн’ Стиг кој се појавуваше во првите две сезони беше поранешниот Ф1 возач, Пери Мекарти. Но, го замени моменталниот ’бел’ Стиг, откако Мекарти го откри својот идентитет.

Во текот на последното шоу, прва епизода од новата 13 сезона, Кларксон се преправаше дека не го позна Шумахер и го праша како се викал пред да биде познат како Стиг. Веднаш потоа во делириум извика: Тоа е Михаел Шумахер!


Сепак, фановите на шоуто се уште се неубедени околу неговиот идентитет. Питер Лотон, уредник на магазинот What Car? за БиБиСи изјави дека презентирањето на Шумахер како мистериозниот супер-возач во бело одело е навистина одлично за публицитетот, но смета дека е и невистинито.

Дали Top Gear, шоуто со неограничен буџет, навистина го има Шумахер се уште останува мистерија, истовремено предизвикувајќи воодушевување од виденото.

Портпаролот на Top Gear потврди дека Шумахер бил Стиг во текот на снимањето и возењето на Ferrari FXX, но додаде дека вистинскиот идентитет на Стиг и понатаму е тајна.