Денес беше промовиран новиот спот за туристичка и културна промоција на Македонија под наслов „Македонија вечна“. Сценарист и режисер на овој спот е Игор Иванов – Изи.

Проектот, нарачан и финансиран од македонската Влада, кој ќе се емитува на странски ТВ канали, денес беше промовиран од продукцијата Пристоп МК.
Оваа видео презентација е замислена како своевидно патување низ природните убавини, културното наследство и туристичките потенцијали на Република Македонија.

„На ова авторско дело работеше 80-член тим, интернационална екипа составена од врвни филмски професионалци од Македонија, Англија, Хрватска, Словенија, Србија и Белгија. Директор на фотографија е Џајлс Натџенс, музиката е на Златко Ориѓански, сценограф е Игор Тошевски, монтажер Нина Велниќ, а костимите се на Жаклина Крстевска и Бланка Будак“, рече на промоцијата Иванов.



“Овој спот и е потребен на Македонија, посебно поради сензитивниот период низ кој поминува. Сценариото за спотот е предадено во исто време со спотот на режисерот Милчо Манчевски, но критиките не ме поколебаа да го направам спотот, а сценариото не е менувано“, изјави Изи.

Спотот бил работен во периодот од 1-ви април до 10-ти јуни на познати и атрактивни туристички локации во Охрид, Скопје, Матка, Витачево, Галичник, Св.Јован Бигорски, Струмица, Стоби. Снимен е на 35 милиметарска лента со високо-професионална техника која вклучува три филмски камери, специјална камера на хеликоптер, најсовремена сценска техника и осветлување. Пост-продукцијата се одвивала во Словенија, Австрија, Хрватска и Македонија.