Ратко Младиќ воопшто не се криел! Босанската Федерална телевизија во вонредното издание на политичкиот магазин „60 минути“ објави досега необјавени видео материјали од Младиќ, снимени последниве десет години.

На снимките може јасно да се види како хашкиот бегалец се забавува на разни прослави, роденденот на внукот, венчавката на синот Дарко и многу други, додека наводно е во бегство.

Сите снимки се веројатно од семејната архива на Младиќ.


Младиќ е снимен и на погребот на својата ќерка Ана, која се самоуби со неговиот омилен пиштол, иако многумина тврдеа никогаш не присуствувал на погребот. Плаче со главата потпрена на мртвата ќерка.

Потоа, снимките го прикажуваат Младиќ кај што слави, пие и ужива со пријатели и роднини. Ја пее и песната од Плави Оркестар „Боље бити пијан него стар“.

Во снимките понатаму е прикажана и куќата во белградската населба Кошутњак во која живеел сосема нормално, примал гости и се дружел.


Еден од гостите е поранешниот началник на Генералштабот на Војската на Југославија, Момчило Перишиќ, обвинет за воени злосторства во Хрватска и за злосторствата во Мостар. Подоцна се појавува и Здравко Толимир, обвинет за злосторствата во Сребреница, Жепа и Зворник.

На 16.9.2000 година снимена е и венчавката на еден негов телохранител во Кула покрај Сараево, каде е снимена колона возила со босански таблички.


Потоа има снимка од касарната во Топџидер, каде игра пинг понг и пие кафе во природа.

Последната снимка прикажана во емисијата „60 минути“ снимена е најверојатно неодамна и на неа се гледа Младиќ кај што си игра во снегот со сопругата и снаата.

Гостин во емисијата беше членот на Претседателството ан БиХ Жељко Комшиќ кој рече дека ќе биде интересно да се видат реакциите на одфицијален Белград, по што водителот Бакир Хаџиомеровиќ коментираше дека веројатно ќе ги обвинат за монтажа.

Комшиќ рече дека не е изненаден од овие снимки, бидејќи според него, Младиќ воопшто не се криел, туку бил штитен од сите српски власти и само се чекало политичка одлука и тој да биде предаден во Хаг.

„Структурата која стои зад Младиќ е многу затворена и добро организирана. Младиќ тогаш беше под заштита на Војската на Југославија, а денес под Војската на Србија. Политичката структура го штити, а тој живее најнормален живот“, рече Комшиќ.

Погледнете ја целата емисија