Момчињата кои во себе носат одредена варијација на генот моноамин оксидаза А (МАОА), или популарно наречен „воинствен ген“ се понаклонети кон приклучување на улични банди, изразено насилство и употреба на оружје.

Научниците од државниот Универзитет во Флорида кои ја спроведоа оваа стујдаија, за прв пат ја потврдија поврзаноста на генот МАОА со насилство, приклучување на машките адолесценти во улични банди и со афинитетот за ракување со оружје.

Резултатите од истражувањето, исклучиво се однесуваат на машката популација. Женската популација покажала отпорност на неговото дејствување, покажува истата студија, објавена во месечникот Comprehensive Psychiatry.

Научниците, набљудувале повеќе од 2.500 лица, проучувајќи го нивната ДНК и информациите за нивниот животен стил.

Студијата фрли ново светло врз начинот на кој што доаѓа до интеракција меѓу генетиката и околината, во која што се појавуваат најекстремните насилни криминалци.

„Досега уличните банди се набљудуваа како социолошки феномен, нашето истражување покажува дека варијантата на специфичниот МАОА ген, во таа смисла игра значајна улога“, изјави криминологот Кевин М. Бивер од Универзитетот во Флорида.

„Поранешните истражувања ги поврзуваа нискоактивните варијанти на МАОА со широкиот спектар антисоцијални, па дури и насилни однесувања, но нашата студија дефинитивно потврди дека со варијантите на МАОА може да се предвиде дали има шанса некои момчиња да станат членови на улични банди“, објасни Бивер.

МАОА генот влијае на нивото на неуротрансмитерите како допамин и серотонин, кои се поврзани со расположението и однесувањето на човекот, а варијантата на генот набљудувана во студијата е поврзана до насилството и е наследна.

Некои студии открија како „воинствениот ген“ е доминантен во културите кои историски се одбележани со војни, судири и агресија. Студијата откри и дека „воинствениот ген “ е поврзан со Х-хромозомот и бидејќи мажите имаат само еден таков хромозом, а жените два, кај мажите не постои друг ген кој би го поништил делувањето на првиот, па затоа жените се отпорни на неговото делување.