Компанијата NEC во јули ќе го пушти во продажба својот искривен монитор со дијагонала од цели 43 инчи. Ако имавте на ум да се освежите со нешто вакво, знајте дека ќе ви треба паричка колку за мал градски автомобил.

NEC CRV43 е сон за сите оние кои користат два или три монитори, бидејќи сега можат да ги заменат со еден единствен, во овој случај со резолуција 2.880 х 900 пиксели. Мониторот има контраст од 10.000:1, време на одзив 0,02 милисекунди, светлина од 200 нита како и HDMI, DVI-D и USB влезови.

Сепак, гејмерите малку ќе ги разочара фактот дека ретко која игра работи на таа резолуција, овој монитор е сепак примарно наменет за бизнис корисниците на кои им треба екстра голем екран (графичари, финансиски аналитичари, експерти од НАСА и сл).

Цената е ’само’ 7.999 долари. Да ве потсетиме, за тие пари можете да си купите четири 30-инчни монитори или еден мал градски автомобил.