Џенерал Моторс ќе го продаде својот бренд Хамер на кинеската компанија Сечуан Тенгзонг. Не е познато колку кинеската фирма ќе плати за зделката.

Кинеската корпорација Тенгзонг соопшти дека е постигната спогодба со банкротираниот американски производител на автомобили за купување на марката Хамер, но цената не е објавена.

Од друга страна од Џенерал Моторс објавија дека нашле купувач за подружницата за производство на спортски возила Хамер, но не открива кој е купувачот. Сепак од американската компанија наведоа дека потегот ќе спаси 3.000 работни места во САД.

Тенгзонг, се занимава со изградба на патишта, пластика, и тешки машини, а купувањето на брендот Хамер им е прво влегување во автомобилскиот бизнис.

Некогаш најголемиот производител на автомобили во светот, Џенерал Моторс влезе во банкрот, за под заштита на судот да се реорганизира во помала, но поефикасна компанија.

Првите Хамери се направени за армијата на САД, а ги произведе компанијата АМ Џенерал. ЏМ го купи овој бренд во 1999 година.