Во писмото што грчката министерка за надворешни работи Дора Бакојани му го испрати на Антонио Милошоски, јасно се наведени грчките ставови. Покрај преименување на нашата земја, ќе се бара и смена на името на народот.

Во писмото напишано на четири страници, испратено на 24 март, Бакојани ги отфрли инцијативите на Милошоски за заедничка комисија за образование и историја, да се потпише декларација за добрососедство и соработка, како и да се дефинира идејата за Рамковниот предлог за унапредување на билатералните односи.

Таа ги оцени како „декларативни изјави со сомнителна корист и делотворност“, а во одговорот за првпат во официјалната дипломатска кореспонденција помеѓу двете земји, освен за името на државата, бара географска одредница и за македонскиот народ.

„Во однос на прашањето за името, кое ја сочинува суштината на проблемите на кои наидуваат односите меѓу нашите земји, Грција направи значаен чекор напред прифаќајќи само ’ерга омнес’ сложено име, кое исто така може да го вклучи и терминот ’Македонија’, со одредница што ќе ја појасни разликата меѓу Вашата земја и народ и грчка Македонија и нејзиното население. Ова е значајно поместување од нашата првична позиција, а со надеж дека ова би можело да претставува основа за постигнување заемно прифатливо решение“, вели во својот одговор Дора Бакојани, што го пренесуваат македонските медиуми.