Српското министерство за економија ја разгледува идејата државните субвенции за купување на „пунто“, покрај на српските граѓани, да им ги понудат и на жителите од соседните земји.

Во српското Министерство за економија сериозно се размислува да им се овозможи на жителите на Македонија, Хрватска, Црна Гора, БиХ и Албанија да можат да ги заменат старите возила „пунто“ за нови модели, произведени во фабриката „Застава“ во Крагуевац, пишува Б92.

Се уште не е прецизирано по која сума сопствениците на стар модел ќе можат да купат ново „пунто“, иако вчера министерот за економија Млаѓан Динкиќ најави дека граѓаните со доплата ќе можат да заменат било кој модел на стар автомобил за ново пунто со државна субвенција.

Пресметката се уште не е направена бидејќи треба да се извршат разговори со фирмите кои се занимаваат со рециклажа на стари автомобили.

Се најавува само дека субвенцијата ќе биде 1000 евра, основниот модел на „пунто“ ќе изнесува 7.300 евра, а истото возило во замена за стар модел, ќе се продава за 5.999 евра на кредит од седум години.