Клаудио Раниери на почетокот на сезоната немаше простор за уживање. Јувентус нижеше лоши резултати и неговата клупа беше прилично нестабилна.

Но, откако два пати го победи Реал Мадрид во Лигата на шампионите, се` трна на подобро, како за Јувентус, така и за Раниери. За судирот со Дел Пјеро повеќе не се зборуваше, како ниту за неговото тренерско (не)знаење.

Раниери стана почитуван и од навивачите, а Јувентус во овој момент е единствениот вистински конкурент на Интер за титулата шампион на Италија.

Баш поради тоа многу често се доведуваат во контекст Раниери и Жозе Мурињо, како и фактот дека не така одамна и двајцата седеа на иста клупа - на лондонски Челзи.

Иако Мурињо дури и сакаше да започне вербална војна со Раниери, овој не му ја оствари желбата, туку како и секогаш џентлменски се постави кон Португалецот.

„Вечера со Мурињо? Ако ме повика со задоволство ќе прифатам. Можеби имаше некои недоразбирања на почетокот, но навистина против тој човек немам ништо негативно да кажам. Можеби е поразличен, но не е вистина дека не ми е симпатичен“, рече Раниери на конференција за новинарите по повод започнувањето на новата фудбалска 2009 година.

Покрај тоа додаде: „Ние и понатаму го сонуваме својот сон во Јувентус. Во игра сме во сите натпреварувања и мора да бидеме задоволни.“