Македонецот Марко Блажевски ќе настапува во престижната автомобилистичка трка Фолксваген Поло Куп во 2009 година во Германија, откако во огромна конкуренција избори пласман на квалификациите во Ошерслебен.

На квалификациите што се одржаа во германскиот град Ошерслебен, најголем број на кандидати имало од Германија дури 80 отсто, а потоа од Шведска и од Англија.

Во големата конкуренција од 36 возачи Македонецот Марко Блажевски избори пласман меѓу 12-те најдобри кои што ќе добијат покана за учевство на Фолксваген Поло Куп во 2009 година.


Инаку Блажевски со своите 16 години бил најмлад возач на квалификациите и единствен претставник од Балканот. Овие трки се одржуваат заедно со ДТМ шампионатот, а се возат вкупно 10 трки од кои девет во Германија и една во Англија.

„Беше тешко на почетокот бидејќи за прв пат седнав на седиште за тркачки автомобили, но со текот на времето ја минав почетната трема и се концентрирав да се изборам за што подобар пласман“, рече Марко Блажевски на денешното претставување пред новинарите, пренесува агенцијата Нетпрес.

Севкупните финансии за учество на ова натпреварување изнесуваат 45.000 евра.

„За потврда за учество на Фолксваген Поло Купот потребно е да се уплати во текот на следната недела првата рата од 5.000 евра. Овие пари за првата рата ги имаме обезбедено од сопствената заштеда, а од понеделник ќе продолжиме да бараме спонзори“, рече таткото на Марко, Орце Блажевски.