Квалификации за СП2010 - резултати и видео

Во третото коло од квалификациите за Светското првенство кое ќе се одржи во 2010 во Јужна Африка, фаворитите беа речиси секаде поуспешни. Во нашата група, Шкотска и Норвешка ремизираа.

Ова коло во нашата група 9 испадна можеби најдобро за нас. Шкотска ремизираше без голови со Норвешка на домашен терен, додека Холандија рутинирано го победи Исланд со 2-0, со головите на Матејсен и Хунтелар.

Сега на врвот останува Холандија со 6 поени од две кола, втора е Шкотска со 4 поени од 3 кола, а трета е Македонија со 3 поени од две кола. Норвешка има 2 бода од исто толку меча, а Исланд има само бод.

Англија го совлада Казахстан со 5-1, со головите на Фердинанд, два на Руни, еден на Дефо и автогол на Кучма, додека голот за Казахстан го постина Кукеев. Во истата, група 6, се одигра и натпреварот Украина - Хрватска кој заврши без голови. Англија останува на првата позиција со 9 поени од три кола, додека Украина е втора со 7.

Во натпреварот што можевте во живо да го следите на Таратур, Германија ја победи Русија со 2-1, со головите на Лукас Подолски и Михаел Балак за Германија, а Андреј Аршавин успеа само да постигне почесен погодок.

Во истата група 4, Финска го совлада Азајберџан со 1-0, а Велс го победи Лихтенштајн со 2-0. На првото место останува Германија со 7 поени од 3 кола, пред Велс кој има 6, трета е Финска со 4, исто колку и Русија.

Италија не успеа да стигне до трите поени во Софија, против Бугарија. Бугарите ги задржаа Аѕурите на резултат од 0-0, а во истата група 8, Грузија и Кипар одиграа нерешено 1-1. Италија останува прва со 7 поени од 3 кола, пред Ирска со 4.

Франција едвај извлече бод во Романија, откако Романците водеа со 2-0 со головите на Петре и Гојан, но Французите изедначија преку Рибери и Гуркуф. Србија славеше со 3-0 против Литванија во истата група, додека Фарските Острови го направија најголемото изненадување ремизирајќи 1-1 со Австрија. Сега во групата 7, први избија Србите со 6 поени исто колку и Литванија, додека Австрија, Романија и Франција имаат по 4.

Чесите загубија во Полска со 2-1. Головите за Полјаците ги постигнаа Брозек и Блажиковски, за Чешка прецизен беше Фенин. Словенија ја совлада С. Ирска со 2-0 во истата група, додека Словачка резервирано славеше со 1-3 во Сан Марино. Сега Полска останува на првата позиција со 7 поени од трите кола, исто колку и Словенија, пред Словачка која има 6. Чешка е на четвртата позиција со само 1 поен.

Шпанија славеше на гостински терен кај Естонија со 3-0, со головите на Хуанито, Давид Виља и Пујол, а во истата група Турција славеше над Босна и Херцеговина со 2-1, и Белгија беше поуспешна од Лихтенштајн со 2-0.

Во групата 2, Швајцарија славеше над Латвија со 2-1, Израел го победи Луксембруг со 1-3, додека Грција победи со 3-0 против Молдавија. Во групата 1, Португалија одигра нерешено само 0-0 со Шведска, а Унгарија славеше против Албанија со 2-0 и Данска со Малта со 3-0.

Следното коло од квалификациите се игра во вторник и среда, кога македонската репрезентација гостува во Рејкјавик каде што ќе игра против Исланд.

Наум Баварец/Таратур

Спорт