Видео: Нови победи на Ливерпул и Атлетико Мадрид

Се чини дека веќе по второто коло во групата Д се се знае. Вечерва Ливерпул и Атлетико на свои терени беа подобри од ПСВ Анјндховен и Марсеј.

Иако се чинеше дека групата ќе биде вистинска група на смртта, веќе по само две кола ситуацијата станува јасна. Имено, вечерва без проблеми нови победи славеа Ливерпул и Атлетико кои со по шест бодови се на врвот од табелата. На спротивната страна, без бодови се екипите на ПСВ и Марсеј кои вечерва претрпеа нови разочарувачки порази.

Ако до сега некоја екипа разочарала во Лигата на шампионите, тогаш тоа е ПСВ од кој се очекуваше многу повеќе. Но наместо добри натпревари на кои сме навикнати, фудбалерите на холандскиот тим ни прикажаа бледи обиди за спротивставување на своите противници. Во првото коло тоа не им помина на домашен терен каде Атлетико ги декласираше со 3:0, а синоќа за нијанса подобро поминаа кај Ливерпул кој ги совлада со 3:1.

Дека избраниците на Рафа Бенитез навистина се наоѓаат во добра форма покажа самиот почеток на натпреварот и раното водство на Црвените кое беше дело на Дирк Кајт во петтата минута од натпреварот. Затишјето на Енфилд траеше половина час се додека во 34 минута Роби Кин не постигна гол за водство од 2:0. Новото засилување за Ливерпул од седум метри одлично реагираше на асистенцијата од Торес и конечно постигна погодок во црвениот дрес.

Продолжението на натпреварот не ни донесе премногу неизвесност, а ако имаше и барем малку тогаш таа беше уништена во 76 минута од Стивен Џерард кој со фантастично изведен слободен удар, на најдобар начин го постигна стоттиот гол во дресот на Ливерпул. Само три минути подоцна Дани Коверманс намали на 3:1, но време за промени немаше и брзо се испостави дека тоа е и конечен резултат.

Една од најсигурните екипи во Лигата на шампионите е и Атлетико Мадрид кој ја прослави втората победа совладувајќи го Марсеј со 2:1. Сите голови на натпреварот беа постигнати во првите 20 минути од натпреварот. Атлетико поведе во 4 минута преку Агуеро, во 16 минута Мамаду Нианг израмни на 1:1, а само шест минути подоцна Раул Гарсија го постави конечниот резултат.

Како што веќе знаете, видеа од натпреварите ширум светот можете да најдете во категоријата Фудбал видео!

Спорт